Тропари преподобным. Часть 4.

Тропарь. Иринарху, затворнику Ростовскому,.

Иринарх Ростовский, затворник

Яко мученика добропроизвольна / и преподобных удобрение, / звезду Ростовскую, / в затворе, узах и веригах Господеви благоугодившаго / и чудес благодать от Него приемшаго, / Иринарха предивнаго песньми хвалебными почтим / и, к нему припадающе, умильно глаголем: / отче преподобне, моли Христа Бога / спастися душам нашим.

Тропарь. Иринарху Соловецкому.

Иринарх Соловецкий, игумен

Постническое по Бозе житие возлюбив, / вся плотская мудрования духу покорил еси / и воздержанием страсти умертвил еси, / во трудех, и бдениих, и молитвах образ быв добродетели, / тем монашескаго жития наставник показался еси, / отче преподобне Иринарше. / Моли Христа Бога спастися душам нашим.

Тропарь. Иродиону Илоезерскому.

Иродион (Родион), Илоезерский, схимонах

Возсия днесь светло, радуется град Белоезеро, / имея во области своей великаго светильника, блаженнаго отца Иродиона. / Сошедшеся убо людие и празднующе пресветлую память его, осиявающу многими деянии чудес дара. / Просящим с верою исцеления, / страждущим от различных недуг подает здравие. / Яко финикс насажден в дому Божия Матере, / яко кедр при водах благодатию Христовою растущ. / И яко же шипок благовонен обстоянии водами огражден. / И мы, чада твоя суще, припадающе, молимтися: / моли Пресвятую Троицу, / еже сохранитися граду нашему от нахождения иноплеменник / и от враг видимых и невидимых. / Яко да твоими, отче, ко Господу молитвами спасаемии / всегда просим с верою у тебе: / моли о нас Христа Бога спастися душам нашим.

Тропарь. Исаакию, затворнику Печерскому, в Ближних пещерах.

Исаакий Печерский, затворник

Светлости святых насладитися вожделев, / в темную вселился еси пещеру, прехвальне, / и добре подвизался еси, Исаакие, / прельщен же быв от врага, / паки крепко попрал еси того вся коварства. / И ныне, яко победитель, / в веселии предстоя Христу Богу, / проси нам мира и велия милости.

Тропарь. Никите, Кириллу, Никифору, Клименту и Исаакию, братьям Алфановым (Сокольницким) в Новгороде, глас 1:.

Никита (Нифонт), Алфанов, Сокольницкий, Новгородский, прп.

Кирилл Алфанов, Сокольницкий, Новгородский, прп.

Никифор Алфанов, Сокольницкий, Новгородский, прп.

Климент Алфанов, Сокольницкий, Новгородский, прп.

Исаакий Алфанов, Сокольницкий, Новгородский, прп.

Послушаша Господня гласа, / добрии рачители бывше, / благий Его ярем на ся вземше, / усердно понесосте / и пос­тничества путь достигше, / преподобнии отцы, святии чудотворцы, / воини Небеснаго Царя Христа, / Никито, Кирилле, Никифоре, Клименте и Исаакие, / сего ра­ди от Вседержительныя десницы венцы неувядаемыми увязостеся, / и Небесною славою одеястеся, / и чудотворении обогатистеся, / темже и о нас молите не престайте, / да получим вечных благ, / мы же сице взываем: / слава Давшему вам к подвигу крепость, / слава Венчавшему вас, / слава Дающему вами всем исцеления.

Тропарь. Кассиану Греку, Угличскому чдтв.

Кассиан грек, Угличский, прп.

Ветхаго Рима имея воспитание, / державу отечества своего, град Мангупский, оставль, / и нивочтоже вменил еси княжение / и славу маловременную суетнаго века Христа ради, / и паче земнаго богатства избра богатство себе Небесное и славу вечную, / возвысив ум свой к Богу, / и житие свое со Ангелы вожделел еси восприяти, / промышлением Божественнаго разума направляемь / и Богоспасаемаго Углича града достигл еси, / и близ в пределех области его над Волгою рекою в пустыню вселився, / и обитель преславну в честь Божия Матере воздвигл еси, / и в ней тело свое предложив яко дар освящен. / Тем молим тя, отче Кассиане, / моли Христа Бога, / да спасет души наша.

Тропарь. Кассиану Римлянину.

Кассиан (Иоанн Кассиан), Римлянин, иеромонах

Постом предочистився, премудрости постигл еси разумение, / от пустынных же Богоносных отец научился еси страстей обузданию. / Того ради подаждь нам твоими молитвами / плоти нашея духу послушание: / еси бо наставник, Кассиане преподобне, / всем поющим о Христе твою память.

Тропарь. Кириаку отшельнику.

Кириак Палестинский, отшельник

Пустынный житель, и в телеси ангел, / и чудотворец показался еси Бого носе отче наш Кириаче, / постом, бдением, молитвою, небесная дарования приим, / исцеляеши недужныя, и души верою притекающих к тебе. / Слава Давшему ти крепость, / слава Венчавшему тя, / слава Действующему тобою всем исцеления.

Тропарь. Кириллу, игумену Белоезерскому.

Кирилл Белозерский, игумен

Яко крин в пустыни Давидски процвел еси, отче Кирилле, / злострастия терние искореняя,/ и собрал еси в ней ученик множество, / страхом Божиим и учением твоим наставляемых, / ихже и до конца яко чадолюбивый отец / не оставил еси посещая, да вси вопием: / слава Давшему ти крепость, / слава Венчавшему тя, / слава Действующему тобою всем исцеления.

Тропарь. Кириллу Новоезерскому.

Кирилл Новоезерский (Новгородский), прп.

Божиим Духом подвизаемь, / слез твоих тучами изсохшее напоил еси, / и безплотное в пустыни житие показал еси, / и еже из глубины сердца бодренными молитвами и постом / благодеяния труды уплодоносил еси, / и вселенную всю просветил еси сиянием чудес твоих, / отче наш Кирилле. / Моли Христа Бога, спастися душам нашим.

Тропарь. Кириллу и Марии, схимм. Радонежским.

Кирилл Радонежский, схимонах

Мария Радонежская, схимонахиня

Блаженств Христовых причастницы, / честнаго супружества и попечения о чадех добрый образе, / праведнии Кирилле и Марие, / плод благочестия, Сергия преподобнаго, нам явившии, / с ним же усердно молите Господа / низпослати нам дух любве и смиренномудрия, / да в мире и единомыслии / прославим Троицу Единосущную.

Тропарь. Кириллу Челмогорскому.

Кирилл Челмогорский, прп.

Днесь возсия нам пресветлая память твоя, славне / яко солнце светозарное, / лучами благодати озаряющи весь мир / и тьму нощи злых духов и от нас отгоняющи. / Днесь Небесныя силы святых Ангел, и мирской народ, / и души праведных мысленно торжествуют, радующеся, / днесь и мы, грешнии, припадающе, молимся; / отче преподобне Кирилле, / Христа Бога моли непрестанно / спасти град и люди, / иже любезно тебе почитающия.

Тропарь. Константину и Косме Косинским, Старорусским.

Константин Косинский, Старорусский, прп.

Косма Косинский, Старорусский, прп.

Яко великаго во отцех Варлаама ученик, / прехвальне Константине, / и сам чадо послушания, блаженнаго Косму, возрастил еси, / темже, преподобнии, вкупе Престолу Владычню ныне предстоящии, / молитвами вашими в вере Православней нас утвердите, / в послушании Церкви Святей укрепите / и вся полезная душам нашим испросите.

Тропарь. Корнилию, чдтв. Комельскому.

Корнилий Комельский, прп.

От юности горящим желанием Божественныя любве разжигаемь, / житейския молвы оставил еси, преподобне, / ревнитель Антонию Великому быв, / безмолвием и жестоким пребыванием последуя Христу, / бдением, и молитвами, и постом образ был еси твоим учеником. / Темже молися Господеви, Корнилие блаженне, / спастися душам нашим.

Тропарь. Корнилию, игумену Палеостровскому, Олонецкому.

Корнилий Палеостровский, Олонецкий, игумен

От юности, премудре, прилежно подвизався, / от Бога наставляемь, / отечество свое оставль — град Псков, / и вселися в пустыню, / во отоце великаго езера Онега, / иноки собра мудре / и извещением Святаго Духа обитель согради / и храм созда Пресвятей Богородице / в похвалу Рождества Ея, / струями же слез твоих / безплотныя враги погрузил еси / и жития твоего целомудрием со ангельскими лики совокупися, / преподобне отче Корнилие, / с нимиже Христа Бога моли / спастися душам нашим.

Тропарь. Корнилию Переяславскому.

Корнилий Переяславский, прп.

Новоявленнаго угодника Божия почтим, / Корнилия преподобнаго, / крест на рамо вземшаго, / иго Христово усердно понесшаго, / иже на невидимыя враги мужественно подвизався / и козни их поправ, яко добр воин, / Владыце Христу предста и молится о душах наших.

Тропарь. Косме, епископу Маиумскому.

Косма Маиумский, Святоградец, еп.

Православия наставниче, / благочестия учителю и чистоты, / вселенныя светильниче, / архиереев богодухновенное удобрение, / Космо премудре, / ученьми твоими вся просветил еси, цевнице духовная, / моли Христа Бога спастися душам нашим.

Тропарь. Косме Яхромскому.

Косма Яхромский, прп.

Горняго желая премирнаго жития, / дольняя возненавидел еси, / и, взем крест свой, последовал еси Христу, / и в пустыню вселился еси, досточудне, / в ней подвизася в пениих, в бдениих и пощениих. / Темже в тя вселися Пресвятый Дух, / но яко имея дерзновение ко Христу Богу, / испроси людем православным здравие и спасение / и не забуди посещая чад своих, / совершающих священную память твою, / Космо, преподобне отче наш.

Тропарь. Ксенофонту Робейскому.

Ксенофонт Робейский, игумен

Пустыни явился еси доброе прозябение, / отче преподобне, / от юности бо чистое житие изволил еси, / духовному учителю последуя, / и, того учением ум твой к Небесным вперив, / в пустыню вселился еси, / и в ней обитель создал еси, / и стаду твоему премудр наставник показался еси, / великому же Новуграду похвала и утверждение, / темже и Христос, яко пресветла светильника, / чудесы обогати и прослави тя. / Ксенофонте, отче наш, / моли Христа Бога спастися душам нашим.

Тропарь. Кукше, сщмч. и Пимену постнику, Печерским, в Ближних пещерах.

Кукша Печерский, сщмч., иеромонах

Пимен Печерский, постник

Мученическою кровию, священне Кукше, / в проповеди Евангелия со учеником ти, блаженным Никоном, честне украсивыйся, / и Пимене, в постничестве светозарно просиявый, / в един день и час внидосте в свет незаходимый, / идеже молитеся Господеви, / да подаст нам велию милость.

Тропарь. Лаврентию, затворнику Печерскому, епископу Туровскому, в Ближних пещерах.

Лаврентий Печерский, Туровский, затворник, еп.

Всеблаженне Лаврентие, / затворивый себе Господа ради в месте тесне / и в нем многа лета трудолюбне поживый, / молися о нас ко Господу, / яко да и мы от всякаго греха чувства затворше, / получим отверзение дверей милости Господни в День судный.

Тропарь. Лаврентию, затворнику Печерскому, в Дальних пещерах.

Лаврентий Печерский, затворник

Затворивый себе Господа ради в темней пещере, / преподобне отче Лаврентие, многолетне / и Оному добре в ней угодивый, / подаждь и нам от всякаго зла чувствия затворити, / и тьмы страстей отвратитися, / и светлость получити Царствия Небеснаго.

Тропарь. Лазарю Галисийскому.

Лазарь Галисийский, иеромонах

Бденными молитвами, теченьми слезными столп омочил еси, / и из глубины воздыханьми / во сто трудов уплодоносил еси, / и был еси пастырь, всем подая прощение, / преподобне отче наш Лазаре: / молися Христу Богу / спастися душам нашим.

Тропарь. Леониду Устьнедумскому.

Леонид Устьнедумский, иеромонах

Божественною любовию и житием духовным / от юности распалився, преподобне, / и вся, яже в мире красная, возненавидев, / Христа единаго от души возлюбил еси, отче, / легкое иго на рамо взем, / Божественным Промыслом и Пречистыя Богородицы чудным явлением направляемь / достиже пустыни / и в ней многолетне подвизался еси / в трудех многих и слезах, / всяким злостраданием плоть свою изнуряя. / Отонудуже Бог, твоя труды видев, / умножи тебе чада в пустыни. / Но яко имея дерзновение к Богу, / моли о нас, рабех твоих, отче преподобне Леониде, / да избавит нас от всех навет вражиих / и спасет души наша.

Тропарь. Леонтию, канонарху Печерскому, в Дальних пещерах.

Леонтий Печерский, канонарх

Всечестный канонарше Леонтие, / правилоначальный бывый в церкви / и в правиле иночестем возсиявший светло, / моли Христа Бога, / да прегрешений оставление / подаст душам нашим.

Тропарь. Лонгину Коряжемскому.

Лонгин Коряжемский, иеромонах

От мятежа мирскаго удалився, / к немерцающему Свету притекл еси, преподобне отче Лонгине, / и ныне чисте зриши Святую Троицу, / Юже моли за ны недостойныя, / да спасет души наша.

Тропарь. Лонгину, вратарю Печерскому, в Дальних пещерах.

Лонгин Печерский, вратарь, Трудолюбивый

Преподобне и Богоблаженне отче Лонгине, / врат монастырских опасный хранителю, / опаснейший же и неусыпный своих чувствий / от всякаго мирскаго суетствия затворителю, / моли нарекшаго Себе дверь Господа Славы, / да отверзет нам дверь милости Своея.

Тропарь. Лонгину Яренгскому, глас 1:.

Лонгин Яренгский, прп.

Свыше Божественною благодатию просветився Богомудре, / многим терпением во временней жизни течение совершил еси, / темже и по успении источаеши чудесем благодать, / иже с верою приходящим к тебе, Лонгине всеблаженне. / Слава Давшему ти крепость, / слава Прославльшему тя в чудесех, / слава Действующему тобою всем исцеление.

Тропарь. Макарию, диакону Печерскому, в Дальних пещерах, глас 7:.

Макарий Печерский, диакон

От юности Христа усердие возлюбив, / вдался еси Тому весь, / яко непорочная жертва, / и, иго Его благое на себе взем, / работал в нем, всечестне Макарие, спешне, / темже убо молим тя: / молися о душах наших.

Тропарь. Макарию Римлянину, Новгородскому чдтв., глас 4:.

Макарий Римлянин, Новгородский, прп.

Рим отечество твое оставив, / в пустыню вселился еси, / и тамо в пусте месте обрет жилище себе, / отбегл еси суеты мира сего, / и в безмолвнем пристанищи / добре направлял еси себе ко Господу. / Сего ради и мы чтущии тя, / притекающе к раце мощей твоих и любезно тую облобызающе, / молим тя, отче Макарие: / моли о нас Господа, / да помилует нас в день судный.

Тропарь. Макарию Великому, Египетскому, глас 1:.

Макарий Великий, Египетский, пресвитер

Пустынный житель, и во плоти Ангел, / и чудотворец явился еси, Богоносе отче наш Макарие, / постом, бдением, молитвою Небесная дарования приим, / исцеляеши недужныя и души верою приходящих ти. / Слава Давшему ти крепость, / слава Венчавшему тя, / слава Действующему тобою всем исцеления.

Тропарь. Макарию, постнику Печерскому, в Ближних пещерах, глас 4:.

Макарий Печерский, постник

Бывший нестяжателем Христа ради / и Того за многия твоя добродетели / в сердце твое вселивый, / блаженне Макарие, / молися о нас, поющих тя.

Тропарь. Макарию Желтоводскому, Унженскому, глас 5:.

Макарий Желтоводский, Унженский, прп.

Днесь град твой Галич тобою хвалится, / в концех бо его пресветло, / яко велие солнце, возсиял еси / и чудесы твоими, преподобне Макарие, вся озарил еси. / И ныне молися Господеви / избавитися душам нашим от прелести вражия / и спастися граду твоему от поганскаго наития.

Тропарь. Макарию Жабынскому, Белевскому чдтв., глас 4:.

Макарий Жабынский, Белевский, иеросхимонах

От мирскаго жития изшед / в тихое пристанище жизни иноческия, преподобне Макарие, вшел еси, / в нейже добре подвизався, душу твою добродетельми превысокими обогатил еси, / и явился еси добр пастырь и учитель иноческому собору, / емуже и обитель возградил еси, / таже в безмолвие вшед и Боговидения сподобився, ко Господу преставился еси, / Иже даром чудес тя обогати. / Егоже ныне моли, / да спасет верою и любовию почитающих святую память твою.

Тропарь. Макарию, игумену Калязинскому, чдтв., глас 8:.

Макарий Калязинский, прп., игумен

Плотская мудрования, отче Макарие, / воздержанием и бдением умертвил еси, / место бо, на немже поты твоя излиял еси, / яко труба, вопиет к Богу, / поведающи твоя исправления, / и по смерти честныя твоя мощи источают исцеления. / Темже вопием ти: / моли Христа Бога, да спасет души наша.

Тропарь. Макрине, глас 2:.

Макрина Каппадокийская, Новая, Младшая, прп.

Жениха твоего смерть видевши, / разсмотрела еси тленную жизнь и суетие мира, / отвсюду вину приимши, / Нетленному Обручнику уневестилася еси, / постом и смирением любовь Того постигающи. / Тем ныне радуется со Ангелы, преподобная Макрино, дух твой.

Тропарь. Максиму Греку, глас 8:.

Максим Грек, прп.

Зарею Духа облистаемь, / витийствующих богомудренно сподобился еси разу­мения, / неведением омраченная сердца человеков светом благочестия просве­щая, / пресветел явился еси Православия светильник, Максиме преподобне, / отонудуже ревности ради Всевидящаго / отечества чужд и странен, Российския стра­ны был еси пресельник, / страдания тем­ниц и заточения от самодержавнаго пре­терпев, / десницею Вышняго венчаешися и чудодействуеши преславная. / И о нас ходатай буди непреложен, / чтущих любовию святую память твою.

Тропарь. Максиму Исповеднику, глас 8:.

Максим Исповедник, прп.

Православия наставниче, / благоче­стия учителю и чистоты, / вселенныя светильниче, / монашествующих богодухновенное удобрение, / Максиме премудре, / ученьми твоими вся просветил еси, цевнице духовная. / Моли Христа Бога спастися душам нашим.

Тропарь. Мардарию, затворнику Печерскому, в Дальних пещерах, глас 4:.

Мардарий Печерский, затворник

Бывый, блаженне Мардарие, / нестяжатель Христа ради,/ и Того за многая твоя благодеяния/ в сердце твое вселивый,/ молися о нас, поющих тя.

Тропарь. Марку Гробокопателю, Печерскому, в Ближних пещерах, глас 1:.

Марк Печерский, Гробокопатель

Умертвив плотския похоти многим воздержанием / и копанием гробов святым, / присно, аки мертв, в пещере живя, / мертвыя повелением своим воздвизал еси, / Марко прехвальне,/ мертви и наша мудрования плотская / и настави нас на течение добродетелей, / моля о нас Единаго Человеколюбца.