Тропари преподобным. Часть 8.

Тропарь. Гавриилу Седмиезерскому.

От юности, богомудре, просветився любовию Христовою, / суетный и многомятежный мир оставил еси. / Житие свое вверя предстательству Пречистыя Богородицы, / слез потоки изливал еси пред честным Ея образом, / и теченьми их седьм езер освятил еси. / И терпения ради украси тя небесными дарами Христос Бог наш, / в чудесех и ученицех славна показа земле Казанской.

Тропарь. Григорию, священноиноку.

Божественную ти раку обстояще, премудре, / зовем ти, преподобне: / ко Владыце всех и Зиждителю молися / избавити нас от бед, / иже верою и любовию тебе / душами и сердцы воспевающе достойно: / слава ти, преподобне всеблаженне Григорие.

Тропарь. Евфимию Архангелогородскому.

Яко сокровище многоценно / и источник, изливающ токи исцелений, / подаде нам Христос честныя мощи твоя, / преподобне Евфимие, / болезни убо отъемлющия страстей различных, / благодать же душам точащия непрестанно, / Егоже моли даровати нам велию милость.

Тропарь. Иоакиму Сарандопорскому, Осоговскому.

Пустынный житель, и в телеси ангел, / и чудотворец явился еси, Богоносе отче наш Иоакиме, / постом, бдением, молитвою, Небесная дарования приим, / исцеляеши недужныя и души верою притекающих ти. / Слава Давшему тебе крепость, / слава Венчавшему тя; / слава Действующему тобою всем исцеления.

Тропарь. Иоанну Пещернику (иже в странах Вавилонских),.

Несумненно Христа иский, / Христово богатство прияти надеявся, / злата громаду безнадежну сотворь, / скоро прескочи, яко яже посреди Лазаря и богатого пропасть, / и легко воспряну во авраамское недро, / пустынный Иоанне, тезоимените благодати и прозрачному голуби, / тем и от Бога приимый прозрения дар / и честному Феодору епископу изрекий невиденное писание / и благочестиву царю Моавию мученический подвиг. / Темже молим тя, отче: / умоли Христа за ны, чтущия тя.

Тропарь. Иоасафу Метеорскому.

Сердцем и душею возлюбив Христа Господа, / вся красная мира сего оставил еси, / изволил же еси паче в смирении и послушании Богу служити, / нежели на престоле царстем владети. / Сего ради благочестно восхваляем тя / и, святую память твою совершающе, вопием ти: / отче Иоасафе Богоблаженне, / моли Христа Бога о спасении рода нашего христианскаго.

Тропарь. Кассиану послушнику и постнику, Печерскому, в Дальних пещерах.

В тебе, отче Кассиане, известно спасеся еже по образу, / восприем бо крест и последовав Христови, / творил еси заповеди Его тщательне. / Темже ныне со Ангелы радуется, преподобне, дух твой.

Тропарь. Кукше Новому, Одесскому.

От юности мир суемудреный и лукавый оставил еси, / Божественною свыше просветився благодатию, преподобне, / многим терпением во временней жизни подвиг совершил еси, / темже источаеши чудес благодать всем с верою приходящим к раце мощей твоих, / Кукшо, преблаженне отче наш.

Тропарь. Лаврентию Черниговскому.

От юности Христа возлюбил еси, / и Тому тесным путем последуя, / сосуд избран Духа Святаго быв, / дар чудотворения и прозрения восприим: / сего ради в невечернем свете Пресвятыя Троицы присно радуяся, / поминай чад Твоих, / Лаврентие преподобне, отче наш.

Тропарь. Макарию Оредежскому, Новгородскому, глас 8:.

Слез твоих теченьми пустыни безплодное возделал еси, / и яже из глубины воздыханьми во сто трудов уплодоносил еси, / и был еси светильник вселенней, сияя чудесы, Макарие, отче наш, / моли Христа Бога спастися душам нашим.

Тропарь. Марку, Ионе и Корнилию Псково-Печерским, глас 8:.

Яко светильницы, явистеся всесветлии / в вертепе Царицы Богоматери, / преподобнии отцы наши Марко, Ионо и Корнилие, / вы бо, крест Христов на рамо вземше, / усердно тому последовасте / и, чистотою Богови приближившеся, / отонудуже силами чудес обогатистеся, / тем и мы любезно прибегаем к вам и умильно глаголем: / о преподобнии, молите Христа Бога / спастися душам нашим.

Тропарь. Петру Коришскому, Сербскому, глас 4:.

Любовию Христовою просвещен, / измлада возлюбил еси монашеское житие / и, возненавидев всякое плотское наслаж­дение, / житие твое исполнил еси терпением, постом и молитвами, / просиял бо еси добродетельми, яко светлое светило, / и ныне, усердно молим тя: / моли Христа Бога / сохранити отечество наше и весь крестоносный народ сербский / и всем даровати велию милость.

Тропарь. Роману Киржачскому, глас 4:.

От юности горячим желанием Божественныя любве разжигаемь, / житейския молвы оставль, преподобне, / ученик великого Сергия был еси, / безмолвием и жестоким пребыванием, / бдением и молитвою, постом последуя Христу; / сего ради избранием учителя твоего / священства сподобляешися от руки блаженнаго Алексия / и пастырь поставляешися обители, яже на Киржаче, / в нейже трудолюбно пожив, ко Господу отходиши, / Романе преподобне, / моли о нас Христа Бога, / со учителем твоим преподобным Сергием, / спастися душам нашим.

Тропарь. Севастиану Карагандинскому, исп., глас 3:.

Троицы Святыя служителю, / земне ан­геле и небесне человече, / духовнаго Оптинскаго старчества преемниче, / Христов священнотаинниче и исповедниче, / Духа Святаго обитель всечестная, / преподобне отче Севастиане, досточтиме, / испроси мирови мир / и душам нашим ве­лию милость.

Тропарь. Серапиону Псковскому, глас 8:.

Изрядством жития чистоту девства приим, Серапионе, / и вся красная мира сего возненавидев, / Христа Единаго возлюбил еси. / Сего ради во внутреннюю пустыню вселився и со зверьми живый, / весь Христов спостник и друг Евфросина учителя твоего был еси, / тем же и молим тя, поминай нас, чтущих святую память твою, да зовем ти: / радуйся, пустынныя похвало, преподобне отче наш.

Тропарь. Симону Радонежскому, глас 5:.

Радуйся, пустыне Радонежская, / израстившая крин духовный, / в вертогра­де преподобнаго Сергия: / Симона, архимандрита Смоленскаго, / познавшаго светлость послушания / и дивнаго птиц видения сподобившагося, / сего воспоминающе, Бога прославляем.

Тропарь. Феодору и Павлу Ростовским, глас 8:.

Звездам заря послушания жизнь луч­ших показа, / яко два светила сияюще нам, / Феодор и Павел Богомудрии, Ростовская похвало, / житием чистым Богу присвоишася.

Тропарь. Феодору, кн. Острожскому, Печерскому, в Дальних пещерах, глас 7:.

Преобразил еси земнаго княжения славу / во иночества образ смиренный, / и вместо врагов видимых / на невидимыя ополчился еси, / и, обою победитель красен являяся, / един от чудотворец Печерских показался еси; / темже и нам ревности Божия дар испроси, / братолюбием сердца наша просвети / и ко спасению веч­ному стези наша, Феодоре блаженне, направи.

Тропарь. Феодосию Едесскому, Столпнику, глас 3:.

Прежде запенся богатственною сетию, яко человек, / но последи нищетою нестяжания посрамил еси врага / и мо­литвами твоими, честный Феодосие, / прият от Бога прозрения дар. / Тем и честному епископу Феодору прорече о Святей Церкви, / еже на враги одоление, / и ныне молися Христови за чтущих тя.

Тропарь. Феодосию Кавказскому, глас 4:.

От юности Христа возлюбил еси, блаженне, / и Его ради на Святой Афон и ко Гробу Господню удалился еси, / и тамо благодатию и даром чудес обогатився, / в страну Российскую к людем своим возвратился еси. / Народы Кавказа в годину гонений молитвами, / подвигом юродства и чудесы многими во Православии укрепивый, / преподобне отче Феодосие, / моли Христа Бога, / да укрепит Господь люди, зде живущия, во Православии, / и оградит землю нашу миром, / и спасет всех, яко милосерд.

Тропарь. Феодосию Терновскому, глас 3:.

В блаженнем безмолвии пустыннем / и на соборех, любовию к Богу горя, / посрамил еси лукавых бесов и еретик злочестивых. / На молитве же стоя, огня светлостию просиял еси / и преставле­нием твоим Ангелов поющих обвеселил еси, / Феодосие, отче наш, / сего ради молим тя: молися о душах наших.