Ин кондак · глас 4 Усекновению главы Иоанна Предтечи И́род, Предте́че, беззако́нновав,/ жене́ подаде́ главу́ твою́ честну́ю,/ е́йже покланя́ющеся, весели́мся;/ Ироди́я же пла́чет и рыда́ет,// и И́род, и пляса́вшая. Тропарь · глас 2 Собору и Усекновению главы Иоанна Предтечи Па́мять пра́веднаго с похвала́ми,/ тебе́ же довле́ет свиде́тельство Госпо́дне, Предте́че:/ пока́зал бо ся еси́ вои́стину и проро́ков честне́йший,/ я́ко и в струя́х крести́ти сподо́бился еси́ Пропове́даннаго./ Те́мже за и́стину пострада́в ра́дуяся,/ благовести́л еси́ и су́щим во а́де Бо́га я́вльшагося пло́тию,/ взе́млющаго грех ми́ра,// и подаю́щаго нам ве́лию ми́лость. Тропарь · глас 4 Благоверному князю Даниилу Московскому Княже́ния твоего́ сла́ву отложи́в,/ озаря́емый Боже́ственною благода́тию,/ Богому́дре кня́же Дании́ле, весь ра́зум в се́рдце от су́етнаго ми́ра сего́/ к Зижди́телю неукло́нно возложи́л еси́/ и, я́ко звезда́ на восто́це Росси́йскаго госуда́рства просия́л еси́,/ целому́дрием же и равноа́нгельным твои́м житие́м/ тече́ние до́брое соверша́я,/ ве́ру соблю́л еси́ непоро́чну,/ тем и по сме́рти просла́ви тя Бог в чудесе́х,/ я́ко источа́еши исцеле́ния ве́рно притека́ющим к честне́й ра́це твое́й;/ сего́ ра́ди днесь пра́зднуем успе́ние твое́, лю́дие твои́./ Ты же, я́ко и́маши дерзнове́ние ко Христу́,/ моли́ спасти́ оте́чество твое́// и ми́рней бы́ти держа́ве на́шей. Ин тропарь · глас 5 Благоверному князю Даниилу Московскому Благодатноро́дный сын Твой,/ Всетвори́телю Го́споди Бо́же наш,/ щедрототво́рством христоподража́тельный оте́ц Дании́л/ в ева́нгельском запове́дании и благоразу́мном свое́м житии́/ чудесодарова́ние и Небе́сная со святы́ми пребыва́ния восприя́т/ от Тебе́, Спаси́теля на́шего Христа́ Иису́са./ Возыме́в бо Твое́ Боже́ственное посо́бие,/ суетномирски́я и плотоо́гненныя стра́сти упраздни́/ и враги́ де́моны, неви́димыя и ви́димыя злотво́рцы/ и разори́тели своего́ великокня́жескаго насле́дия, победи́./ Того́ моли́твами спаси́ вся,// зову́щия Тебе́: Аллилу́ия. Ин тропарь · глас 5 Благоверному князю Даниилу Московскому Благосла́вная похвало́ и благосве́тлый ве́нче/ ца́рствующаго гра́да Москвы́,/ всеблаже́нне Дании́ле, о́тче наш./ По́двигом бо до́брым подвиза́вся,/ благоуго́дное тече́ние соверши́л еси́,/ всера́достныя неконча́емыя жи́зни сподо́блься,/ зри́ши Го́спода Бо́га,/ Ему́же моли́ся,/ благочеству́ющим тя и лобыза́ющим богохрани́мыя твоя́ и чудесото́чныя мо́щи// спасе́ние и насле́дие Ца́рства Небе́снаго дарова́ти. Кондак · глас 4 Благоверному князю Даниилу Московскому Избра́нный Бо́гом от чресл роди́тельских/ и воспита́нный от младе́нчества в зако́не Госпо́дни в му́жа соверше́нна/ и Про́мыслом Вы́шняго, имени́таго гра́да Москвы́ насле́дие кня́жества прие́м,/ ве́рен строи́тель благочести́вым лю́дем твои́м показа́лся еси́, Богоблаже́нне Дании́ле,/ и́хже о́бразом свои́м наставля́я/ и поуча́я за́поведем Госпо́дним вы́ну,/ путе́м, веду́щим в живо́т ве́чный, при́сно ше́ствуя,/ Небе́снаго Ца́рства дости́гл еси́,// иде́же со а́нгельскими водворя́яся ли́ки, пое́ши Бо́гу: Аллилу́ия. Ин кондак · глас 8 Благоверному князю Даниилу Московскому Я́ко Богонасажде́нное и Богоразу́мное дре́во в Росси́и возра́сл еси́/ и многопло́дием Богоподо́бных доброде́телей твои́х утучня́еши сердца́ благочести́вых./ Те́мже в кре́пости по́мощи твоея́, преблаже́нне Дании́ле,/ от вся́ких нас бед свободи́,// да пое́м при́сно: Аллилу́ия. Величание Благоверному князю Даниилу Московскому Ублажа́ем тя,/ благове́рный кня́же Дании́ле,/ и чтим святу́ю па́мять твою́,/ ты бо мо́лиши о нас// Христа́ Бо́га на́шего. Тропарь · глас 4 Благоверному князю Даниилу Московскому на обретение мощей Яви́ся, я́ко звезда́ пресве́тлая,/ благове́рный и преподо́бный кня́же Дании́ле,/ в богопоруче́ннем твое́м гра́де Москве́ в жи́зни вре́менней/ и просвети́ся воздержа́нием, и всено́щным стоя́нием, и посто́м,/ и моли́твою, и слеза́ми ко Всеми́лостивому Спа́су/ за град свой Москву́ и за вся стра́ны Росси́йския земли́./ И по преставле́нии твое́м честны́я твоя́ мо́щи/ источа́ют исцеле́ния неоску́дно приходя́щим с ве́рою,/ те́мже вопие́м ти:/ моли́ Христа́ Бо́га// спасти́ся душа́м на́шим. Ин тропарь · глас 3 Благоверному князю Даниилу Московскому на обретение мощей Яви́лся еси́ в стране́ на́шей,/ я́ко звезда́ пресве́тлая,/ благове́рный кня́же Дании́ле,/ луча́ми све́та твоего́ озаря́я град твой и оби́тель твою́,/ лю́дем правосла́вным побо́рник еси́,/ пле́нным свободи́тель и ни́щим защи́титель./ Моли́ Христа́ Бо́га/ держа́ве Роси́йстей дарова́ти мир// и спасти́ ду́ши на́ша. Кондак · глас 8 Благоверному князю Даниилу Московскому на обретение мощей Красоту́ ми́ра сего́, княже́ние и сла́ву я́ко вре́менная помышля́я,/ и сего́ ра́ди благоче́стно в ми́ре пожи́л еси́, блаже́нне кня́же Дании́ле,/ ми́лостию, и моли́твами, и и́ночеством Бо́гу угоди́в,/ и по преставле́нии свое́м чуде́с дар прии́м от Христа́ Бо́га,/ и свети́льник яви́ся пресве́тлый, просвеща́я свои́ми чудесы́,/ приходя́щим с ве́рою подае́ши ско́рое здра́вие и от бед избавля́еши./ Те́мже Христо́ва Це́рковь пе́сньми сла́вит тя, благочести́вый кня́же Дании́ле,// ца́рствующему твоему́ гра́ду Москве́ вели́кое утвержде́ние. Ин кондак · глас 6 Благоверному князю Даниилу Московскому на обретение мощей Е́же по о́бразу соблю́д непрело́жно,/ и я́же в ми́ре тле́нная оста́вив,/ со а́нгельскими ли́ки предстои́ши Христу́,/ преподо́бне кня́же Дании́ле,/ ника́коже забыва́я чад твои́х,/ но ми́лостивно посеща́я и глаго́ля им:// аз е́смь с ва́ми и никто́же на вы. Тропарь · глас 4 Благоверному великому князю Александру Невскому, в схиме Алексию Позна́й свою́ бра́тию, росси́йский Ио́сифе,/ не в Еги́пте, но на Небеси́ ца́рствующий,/ благове́рный кня́же Алекса́ндре,/ и приими́ моле́ния их,/ умножа́я жи́та лю́дем плодоно́сием земли́ твоея́,/ гра́ды влады́чествия твоего́ огражда́я моле́нием,// правосла́вным христиа́ном на сопроти́вныя спобо́рствуя. Тропарь · глас 4 Благоверному великому князю Александру Невскому, в схиме Алексию Я́ко благочести́ваго ко́рене/ пречестна́я о́трасль был еси́, блаже́нне Алекса́ндре,/ яви́ бо тя Христо́с я́ко не́кое Боже́ственное сокро́вище Росси́йстей земли́,/ но́ваго чудотво́рца пресла́вна и Богоприя́тна./ И днесь соше́дшеся в па́мять твою́ ве́рою и любо́вию,/ во псалме́х и пе́ниих ра́дующеся сла́вим Го́спода,/ да́вшаго тебе́ благода́ть исцеле́ний./ Его́же моли́ спасти́ град сей,/ и держа́ве Росси́йстей Богоуго́дней бы́ти,// и сыново́м Росси́йским спасти́ся. Кондак · глас 8 Благоверному великому князю Александру Невскому, в схиме Алексию Я́ко звезду́ тя пресве́тлу почита́ем,/ от восто́ка возсия́вшую, и на за́пад прише́дшую,/ всю бо страну́ сию́ чудесы́ и добро́тою обогаща́еши,/ и просвеща́еши ве́рою чту́щия па́мять твою́, Алекса́ндре блаже́нне./ Сего́ ра́ди днесь пра́зднуем твое́ успе́ние, лю́дие твои́ су́щии,/ моли́ спасти́ Оте́чество твое́, и вся притека́ющия к ра́це моще́й твои́х,/ и ве́рно вопию́щия ти́:// ра́дуйся, гра́ду на́шему утвержде́ние. Ин кондак · глас 4 Благоверному великому князю Александру Невскому, в схиме Алексию Я́коже сро́дницы твои́, Бори́с и Глеб,/ яви́шася тебе́ с Небесе́ в по́мощь,/ подвиза́ющемуся на Ве́лгера Све́йскаго и во́ев его́,/ та́ко и ты ны́не,/ блаже́нне Алекса́ндре,/ прииди́ в по́мощь твои́м сро́дником // и побори́ борю́щия ны. Величание Благоверному великому князю Александру Невскому, в схиме Алексию Велича́ем тя,/ благове́рный кня́же Алекса́ндре,/ и чтим святу́ю па́мять твою́,/ ты бо мо́лиши о нас// Христа́ Бо́га на́шего. Кондак · глас 8 Святителям Александру, Иоанну Постнику и Павлу Новому, патриархам Константинопольским Христо́вою любо́вию распала́еми, сла́внии,/ и яре́м Его́ прие́мшии — Кре́ст Честны́й,/ подража́тели Того́ жития́ яви́стеся/ и Боже́ственныя сла́вы Его́ прича́стницы бы́сте,/ Алекса́ндре богому́дре со Иоа́нном чу́дным и Па́влом сла́вным./ Темже, Престо́лу Его́ предстоя́ще,// прилежно моли́теся за ду́ши на́ша. Тропарь · глас 4 Святителю Иоанну Постнику, патриарху Константинопольскому Пра́вило ве́ры и о́браз кро́тости,/ воздержа́ния учи́теля/ яви́ тя ста́ду твоему́/ я́же веще́й И ́ стина:/ сего́ ра́ди стяжа́л еси́ смире́нием высо́кая,/ нището́ю бога́тая,/ о́тче Иоа́нне,/ моли́ Христа́ Бо́га// спасти́ся душа́м на́шим. Тропарь · глас 4 Преподобному Александру Свирскому От ю́ности, Богому́дре, жела́нием духо́вным в пусты́ню всели́вся,/ еди́наго Христа́ возжела́л еси́ усе́рдно стопа́м в след ходи́ти,/ те́мже и а́нгельстии чи́ни, зря́ще тя, удиви́шася,/ ка́ко, с пло́тию к неви́димым ко́знем подвиза́вся, прему́дре,/ победи́л еси́ полки́ страсте́й воздержа́нием/ и яви́лся еси́ равноа́нгелен на земли́,/ Алекса́ндре, преподо́бне,/ моли́ Христа́ Бо́га,// да спасе́т ду́ши на́ша. Кондак · глас 8 Преподобному Александру Свирскому Я́ко многосве́тлая звезда́ днесь в страна́х росси́йских возсия́л еси́, о́тче,/ всели́вся в пусты́ню, Христо́вым стопа́м после́довати усе́рдно возжеле́л еси́/ и, Того́ свято́е и́го на ра́мо твое́ взем - честны́й крест,/ умертви́л еси́ труды́ по́двиг твои́х теле́сная взыгра́ния,/ те́мже вопие́м ти:/ спаси́ ста́до твое́, е́же собра́л еси́, му́дре, да зове́м ти:// ра́дуйся, преподо́бне Алекса́ндре, о́тче наш. Тропарь · глас 8 Святителю Савве I, архиепископу Сербскому Правосла́вия наста́вниче,/ благоче́стия учи́телю и чистоты́,/ вселе́нныя свети́льниче,/ архиере́ев Богодухнове́нное удобре́ние,/ Са́вво прему́дре,/ уче́ньми твои́ми вся просвети́л еси́,/ цевни́це духо́вная.// Моли́ Христа́ Бо́га спасти́ся душа́м на́шим. Кондак · глас 2 Святителю Савве I, архиепископу Сербскому Струя́ми слез твои́х, Богоно́сне Са́вво,/ це́рковь теле́сную очи́стив,/ слуга́ бысть Святы́я Тро́ицы,/ сохраня́й оте́чество свое́ непобеди́мо,// тому́ бо ты еси́ утвержде́ние. Ин кондак · глас 8 Святителю Савве I, архиепископу Сербскому Я́ко первосвяти́теля вели́каго, и апо́столов соо́бщника,/ Це́рковь прославля́ет тя люде́й твои́х, преподо́бне,/ но я́ко име́я дерзнове́ние ко Христу́ Бо́гу,/ моли́твами твои́ми от вся́ких нас бед спаса́й, да зове́м ти:// ра́дуйся, о́тче Са́вво, Богому́дре. Ин кондак · глас 2 Святителю Савве I, архиепископу Сербскому Избра́ннаго от пеле́н Христо́вою благода́тию/ и возлю́бленнаго от ю́ности Бо́жиим Ду́хом,/ ю́ностный цвет, Са́вву блаже́ннаго,/ похва́льныя венцы́, ве́рнии, днесь спле́тше/ и боже́ственную главу́ его́ венча́юще, воззове́м:// ра́дуйся, о́тче, Бо́жие жили́ще. Тропарь · глас 3 Священноисповеднику Петру Чельцову Земли́ Ру́сския украше́ние,/ пра́вою ве́рою благоче́стно пожи́л еси́,/ ве́рныя в годи́ну гоне́ний и́стине науча́я и утеша́я,/ у́зы, гоне́ния и ско́рби терпя́,/ мо́лим тя́ пра́ведне о́тче Пе́тре,/ спаса́й на́с моли́твами твои́ми// от все́х бе́д и печа́лей. Кондак · глас 4 Священноисповеднику Петру Чельцову Первоверхо́вному соиме́ннаго па́стыря/ уте́шителя скорбя́щих, цели́теля немощны́х,/ Хвалу́ и утеше́ние на́ше дне́сь любо́вию восхва́лим ве́рнии./ Се́й бо е́сть цели́тель до́блий// и моли́твенник о душа́х на́ших. Тропарь · глас 2 В субботу, всем святым Апо́столи, му́ченицы и проро́цы,/ святи́телие, преподо́бнии и пра́веднии,/ до́бре по́двиг соверши́вшии и ве́ру соблю́дшии,/ дерзнове́ние иму́ще ко Спа́су,/ о нас Того́, я́ко Бла́га, моли́те// спасти́ся, мо́лимся, душа́м на́шим. Кондак · глас 8 В субботу, всем святым Я́ко нача́тки естества́, Насади́телю тва́ри,/ вселе́нная прино́сит Ти, Го́споди, богоно́сныя му́ченики;/ тех моли́твами в ми́ре глубо́це// Це́рковь Твою́, жи́тельство Твое́ Богоро́дицею соблюди́, Многоми́лостиве. Тропарь · глас 2 В субботу, за умерших Помяни́, Го́споди, я́ко благ, рабы Твоя́,/ и, ели́ка в житии́ согреши́ша, прости́:/ никто́же бо безгре́шен, то́кмо Ты,// моги́й и преста́вленным да́ти поко́й. Кондак · глас 8 В субботу, за умерших Со святы́ми упоко́й,/ Христе́,/ ду́ши раб Твои́х,/ иде́же несть боле́знь, ни печа́ль,/ ни воздыха́ние,// но жизнь безконе́чная.
