Канон благоверному великому князю Всеволоду, во святом крещении Гавриилу, Новгородскому, Псковскому, чудотворцу

Минея, 11 Февраля.

Глас 2

Песнь 1

Ирмос: Во глубине́ постла́ иногда́/ фараони́тское всево́инство преоруже́нная си́ла,/ вопло́щшееся же Сло́во всезло́бный грех потреби́ло есть,/ Препросла́вленный Госпо́дь, сла́вно бо просла́вися.

Припев: Святы́й благове́рный кня́же Всéволоде, моли́ Бо́га о на́с.

Высоко́ житие́ име́я и восхожде́нии Боже́ственными весь све́тел быв,/ просвеще́ние ми испроси́, восхваля́ющу честны́я твоя́ по́двиги,/ и́миже до́бре пожи́в, улучи́л еси́, Все́володе,/ и́хже наде́ялся еси́.

Припев: Святы́й благове́рный кня́же Всéволоде, моли́ Бо́га о на́с.

Мироуха́нная любя́ уче́ния,/ и во чте́нии Свяще́нных Писа́ний упражня́яся,/ сласте́й уклони́лся еси́, блаже́нне, смра́дных и безче́стных/ и облагово́нился еси́, Боже́ственными добро́тами украша́емь.

Сла́ва Отцу́ и Сы́ну и Свято́му Ду́ху.

Дрема́ние о́чию от души́, блаже́нне, отгна́л еси́,/ бдя и Бо́гови приединева́яся всено́щными стоя́нии,/ непрекло́нен ну́ждами естества́,/ те́мже ко дню невече́рнему дости́гл еси́.

И ны́не и при́сно и во ве́ки веко́в. Ами́нь.

Богородичен: Я́ко черто́г одушевле́н Бо́жий и кади́льницу мы́сленнаго и светоно́снаго у́гля,/ Присноблагода́тную ублажа́ем Богоро́дицу, зову́ще:/ ра́дуйся, Хода́таице спаси́тельнаго воскресе́ния.

Песнь 3

Ирмос: На ка́мени мя ве́ры утверди́в,/ разшири́л еси́ уста́ моя́ на враги́ моя́,/ возвесели́ бо ся дух мой внегда́ пе́ти:/ несть свят, я́коже Бог наш,/ и несть пра́веден, па́че Тебе́, Го́споди.

Припев: Святы́й благове́рный кня́же Всéволоде, моли́ Бо́га о на́с.

Глаго́лом живото́чным внима́я, испи́л еси́ во́ду спасе́ния,/ возгнуша́вся го́рькаго греха́, и, поя́, глаго́лал еси́ Бо́гови, Все́володе:/ я́ко несть свя́та, па́че Тебе́, Го́споди.

Припев: Святы́й благове́рный кня́же Всéволоде, моли́ Бо́га о на́с.

Ми́лование стяжа́л еси́ христоподража́тельно,/ разда́л еси́ бога́тство тре́бующим,/ Небе́сное бога́тство, хода́тайствующее тебе́, е́же и получи́л еси́, поя́, Все́володе:/ я́ко несть свя́та, па́че Тебе́, Го́споди.

Сла́ва Отцу́ и Сы́ну и Свято́му Ду́ху.

Присво́ився Зижди́телю любо́вию Боже́ственною, прия́т Небе́сное насле́дие/ и дре́ва живо́тнаго прича́стник был еси́,/ обще́нием обо́жаем, и поя́, сла́вне:/ я́ко несть свя́та, па́че Тебе́, Го́споди.

И ны́не и при́сно и во ве́ки веко́в. Ами́нь.

Богородичен: Су́щи А́нгел честне́йши,/ Зижди́теля А́нгелов во утро́бе носи́ла еси́ и родила́ еси́ неизрече́нно,/ Ему́же вси пое́м:/ Ты еси́ Бог наш,/ несть свя́та, па́че Тебе́, Го́споди.

Седален, глас 4

Благоволи́в благи́ми дея́нии,/ искуси́лся еси́, я́ко зла́то в пещи́ , напа́стьми, Все́володе сла́вне./ Те́мже и по сме́рти источа́еши бога́тно чудеса́, я́ко во́ды,/ и неду́ги исцеля́еши, о нас при́сно моля́ся,/ я́ко да согреше́ний проще́ние прии́мем.

Песнь 4

Ирмос: Прише́л еси́ от Де́вы не хода́тай, ни А́нгел,/ но Сам, Го́споди, вопло́щься,/ и спасл еси́ всего́ мя, челове́ка./ Тем зову́ Ти: сла́ва си́ле Твое́й, Го́споди.

Припев: Святы́й благове́рный кня́же Всéволоде, моли́ Бо́га о на́с.

Уче́ния оте́ческая храня́ невреди́мо,/ правосла́вно мудрова́ние ты от младе́нства име́л еси́,/ житие́ нескве́рно и ми́лостивен нрав,/ досточу́дне.

Припев: Святы́й благове́рный кня́же Всéволоде, моли́ Бо́га о на́с.

Ни молва́ мирска́я, ни вла́сти держа́ние,/ ни сла́ва тле́нная твое́ е́же к Бо́гу жела́ние уста́виша, Все́володе,/ но благоволи́л еси́ вои́стинну Боже́ственными дея́нии.

Припев: Святы́й благове́рный кня́же Всéволоде, моли́ Бо́га о на́с.

Возвыша́емь Боже́ственными поуче́нии всегда́,/ врага́ смири́л еси́/ и исцеле́ний де́йство прия́т, Все́володе,/ судо́м пра́ведным вся управля́ющаго.

Сла́ва Отцу́ и Сы́ну и Свято́му Ду́ху.

Иска́пающи сла́дость ра́ка моще́й твои́х бога́тых исцеле́ний,/ стра́сти отгоня́ет, Все́володе, ве́рою чту́щих тя/ и попаля́ет бесо́в вся полки́.

И ны́не и при́сно и во ве́ки веко́в. Ами́нь.

Богородичен: Всепе́тая, во́инствы Го́рними пева́емаго Бо́га породила́ еси́,/ Челове́ка вои́стинну бы́вша,/ Его́же о рабе́х Твои́х моля́щи не преста́й, Присноде́во.

Песнь 5

Ирмос: Просвеще́ние во тьме лежа́щих,/ спасе́ние отча́янных, Христе́ Спа́се мой,/ к Тебе́ у́тренюю, Царю́ ми́ра,/ просвети́ мя сия́нием Твои́м,/ ино́го бо, ра́зве Тебе́, бо́га не зна́ю.

Припев: Святы́й благове́рный кня́же Всéволоде, моли́ Бо́га о на́с.

Заре́ю честно́ю Святы́я Тро́ицы просвеще́н,/ зако́ном же Сея́ огражде́н, нощь жития́ непреткнове́нно ты премину́л еси́,/ виде́нии Боже́ственными окриля́емь, блаже́нне,/ и в Боже́ственную жизнь всели́лся еси́.

Припев: Святы́й благове́рный кня́же Всéволоде, моли́ Бо́га о на́с.

Ны́не на тебе́ чу́до ве́лие зри́тся, и у́жаса испо́лнь:/ ка́ко по погребе́нии вои́стинну мно́го лет соблюде́ся неруши́мо, блаже́нне,/ твое́ те́ло, во гро́бе лежа́щее,/ судьба́ми, и́миже весть Сам, прославля́яй тя.

Сла́ва Отцу́ и Сы́ну и Свято́му Ду́ху.

Бла́гоже твоему́, е́же к Бо́гу, дерзнове́нию,/ бла́гоже жела́нию, е́же в се́рдцы к Нему́ име́л еси́,/ бла́го пожи́в, Гаврии́ле,/ просия́л еси́ пресла́вно Боже́ственными светлостьми́/ и уясни́л еси́ ве́рных совокупле́ния.

И ны́не и при́сно и во ве́ки веко́в. Ами́нь.

Богородичен: О нас из Тебе́ воплоще́ннаго, Де́во Ма́ти, всегда́ моли́,/ благоче́стно Тя блажа́щих,/ изба́витися бед, душетле́нных страсте́й, и печа́лей,/ и ве́чнующаго пла́мене муче́ния.

Песнь 6

Ирмос: В бе́здне грехо́вней валя́яся,/ неизсле́дную милосе́рдия Твоего́ призыва́ю бе́здну:/ от тли, Бо́же, мя возведи́.

Припев: Святы́й благове́рный кня́же Всéволоде, моли́ Бо́га о на́с.

Точе́ния сла́дка иска́паху, блаже́нне, по́тове твои́,/ и ра́дование, и исцеле́ний сия́ние в хвалу́ Христа́ Бо́га на́шего.

Припев: Святы́й благове́рный кня́же Всéволоде, моли́ Бо́га о на́с.

Во дво́рех Бо́жиих процве́л еси́ виногра́д многопло́ден прозя́бший,/ доброде́телей гро́здие, де́лателю душа́м оби́лие пода́в.

Сла́ва Отцу́ и Сы́ну и Свято́му Ду́ху.

Ца́рства Бо́жия возжеле́л еси́ и, над страстьми́ ца́рствовав, Все́володе,/ по благоволе́нию лу́чшему ра́дость пра́ведных получи́л еси́.

И ны́не и при́сно и во ве́ки веко́в. Ами́нь.

Богородичен: Избра́нна Бо́гу бы́вши, я́ко прекра́сна,/ село́ простра́нно Сему́, Де́во, была́ еси́,/ и черто́г, и све́щник, и трапе́за.

Кондак, глас 8

Многому́дренно пресели́вся во град Псков, блаже́нне кня́же Гаврии́ле,/ плод благи́й Бо́гови в жи́зни сей был еси́,/ присноцвету́щ доброде́тельми и, я́коже Дави́д, незло́бием./ Того́ ра́ди получи́л еси́ жизнь ве́чную на Небесе́х,/ всегда́ зря Святу́ю Тро́ицу./ Моли́ изба́витися нам от вся́ких бед, да зове́м ти:/ ра́дуйся, утвержде́ние гра́ду на́шему.

Икос

Всечестну́ю па́мять почти́м уго́дника Христо́ва, вели́каго кня́зя Все́волода,/ оте́ческою диади́мою от ю́ности укра́шена,/ хра́браго во́ина на супоста́ты и вла́стеля благоути́шна,/ и ра́достныя глаго́лы от се́рдца воззове́м к нему́, си́це вопию́ще:/ ра́дуйся, я́ко из млады́х ногте́й Бо́га возлюби́в;/ ра́дуйся, я́ко за́поведей Его́ нело́жный храни́тель;/ ра́дуйся, земли́ слове́нстей украше́ние;/ ра́дуйся, церко́вный строи́телю и обогати́телю неску́дный;/ ра́дуйся, церква́м украше́ние и и́стинный побо́рниче;/ ра́дуйся, нело́жный прави́телю о́тческих преда́ний;/ ра́дуйся, благоче́стия столп, непоколеби́м вра́жиими прило́ги;/ ра́дуйся, я́ко во вре́мя вели́каго гла́да преизоби́льный ни́щим и си́рым пита́телю;/ ра́дуйся, бе́дным утеше́ние и засту́пник;/ ра́дуйся и весели́ся, я́ко сугу́бу мзду Небе́сную сугу́ба ра́ди изгна́ния от Бо́га обре́л еси́;/ ра́дуйся, я́ко сподо́бился еси́ восприя́тия/ сугу́быя благода́ти вене́ц пресве́тел и исто́чник исцеле́ния;/ ра́дуйся, пресла́вный кня́же Гаврии́ле, князе́м Росси́йским похвала́;/ ра́дуйся, утвержде́ние гра́ду на́шему.

Песнь 7

Ирмос: Богопроти́вное веле́ние беззако́ннующаго мучи́теля/ высо́к пла́мень вознесло́ есть;/ Христо́с же простре́ Богочести́вым отроко́м ро́су духо́вную,/ Сый благослове́н и препросла́влен.

Припев: Святы́й благове́рный кня́же Всéволоде, моли́ Бо́га о на́с.

Кре́постию вжили́вся Живода́вца, пло́ти удержа́л еси́ жела́ния, пребога́те,/ и ум впери́л еси́ к Небе́сным, поя́ в кре́пости:/ благослове́н Бог оте́ц на́ших.

Припев: Святы́й благове́рный кня́же Всéволоде, моли́ Бо́га о на́с.

Сам ся благоро́ден сотвори́л еси́,/ благоро́дны о́бразы стяжа́в ума́ це́лостию;/ поуче́нием же упражня́яся Богодухнове́нных Писа́ний,/ все твое́ жела́ние на Бо́га Всеви́дца, блаже́нне, возложи́л еси́.

Сла́ва Отцу́ и Сы́ну и Свято́му Ду́ху.

Вы́шняго ца́рства, вы́шняго гра́да, Бо́жия рая́,/ пра́ведных наслажде́ния, пи́щи нетле́нныя,/ бога́тства некра́домаго, Све́та Невече́рняго/ сподо́бился еси́, блаже́нне Все́володе.

И ны́не и при́сно и во ве́ки веко́в. Ами́нь.

Богородичен: Его́же родила́ еси́, Влады́чице, при́сно моли́/ рабо́ты изба́вити мя страсте́й и осужде́ния,/ и одержа́щаго мя лю́таго отча́яния, и оскорбля́ющих мя удержа́ния,/ Чи́стая, Богора́дованная.

Песнь 8

Ирмос: В пещи́ о́трочестей прообрази́л еси́ иногда́ Твою́ Ма́терь, Го́споди,/ о́браз же Сия́ из огня́ изыма́ше, неопа́льно входя́щия,/ Ю́же пое́м, я́вльшуюся Тобо́ю конце́м днесь,/ и превозно́сим во вся ве́ки.

Припев: Святы́й благове́рный кня́же Всéволоде, моли́ Бо́га о на́с.

Огнь помышля́я стра́шный, пред престо́лом Христо́вым хотя́щь пали́ти,/ умиле́нием се́рдца теплы́ излива́еши ка́пли слез,/ погаша́я те́ми пещь страсте́й, Все́володе Богому́дре.

Припев: Святы́й благове́рный кня́же Всéволоде, моли́ Бо́га о на́с.

Все предложи́л еси́ к Бо́гу, му́дре, душе́вное о́ко/ и Тому́ прилепи́лся еси́, вопия́ псало́мски:/ Христе́ мой, ка́ла мя изба́ви смертоно́сных страсте́й во ве́ки.

Припев: Святы́й благове́рный кня́же Всéволоде, моли́ Бо́га о на́с.

Терпе́нием пожда́тель и се́рдцем смире́н, ты был еси́ ми́лостив тре́бующим,/ обы́чай принося́ благ, и о́бразы доброде́тельны, всече́стне,/ в ни́хже до́бре пожи́в, чуде́с то́чиши благода́ть.

Благослови́м Отца́ и Сы́на и Свята́го Ду́ха, Го́спода.

Ра́зум име́я Боже́ствен, испо́лнитель Влады́чних яви́лся еси́ слове́с,/ десны́я любя́ стези́, ле́вых же я́ве уклоня́яся, я́ко благоу́мен и мудр:/ те́мже тя почита́ем, Богому́дре, во ве́ки.

И ны́не и при́сно и во ве́ки веко́в. Ами́нь.

Богородичен: Ада́мов Соде́тель от крове́й Твои́х чи́стых зи́ждется и млеко́м пита́ется,/ пита́яй вся́ко дыха́ние, Де́во Богоро́дице,/ те́мже я́ко Бо́жию Тя сла́вим Ма́терь.

Песнь 9

Ирмос: Безнача́льна Роди́теля Сын, Бог и Госпо́дь,/ вопло́щься от Де́вы, нам яви́ся/ омраче́нная просвети́ти, собра́ти расточе́нная./ Тем Всепе́тую Богоро́дицу велича́ем.

Припев: Святы́й благове́рный кня́же Всéволоде, моли́ Бо́га о на́с.

Ви́дети жела́я сла́ву Бо́га на́шего,/ доброде́телей благообра́зием себе́ удобри́л еси́/ и, свещу́ нося́, вшел еси́ в све́тлый черто́г,/ со А́нгелы живы́й ясне́е наслажда́ешися Боговиде́ния.

Припев: Святы́й благове́рный кня́же Всéволоде, моли́ Бо́га о на́с.

Я́ко у́тро, я́ко со́лнце, возсия́ па́мять твоя́,/ су́щая во мра́це сердца́ просвеща́ющи:/ ты бо све́та и дне я́ко вои́стинну сын яви́лся еси́,/ Богому́дре Все́володе,/ сего́ ра́ди тя почита́ем.

Припев: Святы́й благове́рный кня́же Всéволоде, моли́ Бо́га о на́с.

Му́дростию укра́шен и ра́зумом просвеще́н,/ смире́нием се́рдца ле́потствуя, высото́ю жития́ сия́я,/ к мы́сленным преше́л еси́ дворо́м,/ иде́же нас помина́еши, почита́ющих тя, Все́володе.

Сла́ва Отцу́ и Сы́ну и Свято́му Ду́ху.

День пра́зднественный и по́льзы хода́тайственный/ честны́й твой соверша́ем от земли́ преставле́ния:/ ты бо Госпо́день уго́дник и Того́ за́поведей де́латель яви́лся еси́ непосты́ден,/ досточу́дне Все́володе.

И ны́не и при́сно и во ве́ки веко́в. Ами́нь.

Богородичен: Све́та прия́телище утро́ба Твоя́ бысть, просве́щшаго мир, Богора́дованная./ Те́мже молю́ Тя, окая́нный:/ све́тлу зарю́ пода́ждь ми, Богоневе́сто, мольба́ми Все́волода Богому́драго.

Светилен

Боже́ственною благода́тию просвети́вся,/ и по сме́рти показа́л еси́ све́тлость жития́ твоего́:/ источа́еши ми́рови благода́ть, притека́ющим к ра́це моще́й твои́х, всеблаже́нне Гаврии́ле,/ и моли́ спасти́ся чту́щим тя.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Богородичен: В Тя всели́ся, Присноде́во Богоро́дице, я́ве Соде́тель и Госпо́дь всех/ и Еди́ну Трисия́нну зра́ку Божества́ покланя́тися/ благочести́выми кня́зи в Росси́и челове́ческий род научи́ и просвети́.

Молитва 2-я благоверному князю Всеволоду, в Крещении Гавриилу, Псковскому

О, святы́й кня́же Все́володе-Гаврии́ле! К тебе́ у́бо прибега́ем мы, гре́шнии раби́ Бо́жии (имена), и умиле́нно про́сим тя: моли́ Всеблага́го Бо́га, да отврати́т от нас гнев Свой, пра́ведно, по дело́м на́шим, на ны дви́жимый, и, презре́в безчи́сленная прегреше́ния на́ша, обрати́т нас на путь покая́ния и спасе́ния. Огради́ молит́вами твои́ми в ми́ре жизнь на́шу и во всем благо́е поспеше́ние и вся к животу́ и благоче́стию потре́бная нам дарова́ти испроси́, да ти́хое и безмо́лвное житие́ поживе́м во вся́ком благоче́стии и чистоте́ и сподо́бимся Небе́снаго Ца́рствия, сла́вяще Отца́ и Сы́на и Свята́го Ду́ха и твое́ заступле́ние, во ве́ки веко́в. Ами́нь.

Молитва благоверному князю Всеволоду, в Крещении Гавриилу, Псковскому

О, вели́кий уго́дниче Бо́жий и пресла́вный чудотво́рче, святы́й благове́рный кня́же Все́володе-Гаврии́ле, гра́да Пско́ва и всея́ держа́вы Росси́йския небе́сный засту́пниче и покрови́телю, и всех нас усе́рдный пред Бо́гом предста́телю и защи́тителю! Предстоя́ Престо́лу Вели́каго Царя́ и Бо́га на́шего, в Тро́ице Святе́й сла́вимаго и покланя́емаго, ве́лие дерзнове́ние к Нему́ и́маши, я́ко ве́рный раб Его́ и уго́дник. К тебе́ у́бо, я́ко сро́дному нам и многомо́щному пред Го́сподем хода́таю, прибега́ем мы гре́шнии и недосто́йнии, и умиле́нно про́сим тя: моли́ Всеблага́го Бо́га, да отврати́т от нас гнев Свой, пра́ведно по дела́м на́шим на ны дви́жимый, и презре́в безчи́сленная прегреше́ния на́ша, обрати́т нас на путь покая́ния и спасе́ния. Огради́ моли́твами твои́ми в мире жизнь на́шу, и ко всем благо́е поспеше́ние и вся к животу́ и благоче́стию потре́бная нам дарова́ти испроси́, и я́коже дре́вле град твой Псков от плене́ния и разоре́ния ра́тнаго изба́вил еси́, та́ко и ны́не и нас и вся гра́ды и ве́си страны́ на́шея от вся́ких напа́стей и бед и внеза́пныя сме́рти предста́тельством твои́м изба́ви, и от всех враг ви́димых и неви́димых покро́вом твои́м защити́. Сохрани́ моли́твами твои́ми в ми́ре держа́ву на́шу и будь всей стране́ Росси́йстей кре́пкое огражде́ние; да ти́хое и безмо́лвное житие́ поживе́м во вся́ком благоче́стии и чистоте́, и та́ко в ми́ре вре́менное сие́ житие́ преше́дшии, в ве́чный дости́гнем поко́й, и сподо́бимся Небе́снаго Ца́рствия, сла́вяще Отца́ и Сы́на и Свята́го Ду́ха, и твое́ свято́е заступле́ние, во ве́ки веко́в. Ами́нь.