Преподобномученик Лукиан Антиохийский

Воздержа́нием по́стничества и муче́ния кро́вию/ ты, стяжа́в вене́ц неувяда́емый, священному́чениче Лукиа́не,/ Антиохи́йская похвало́,/ о нас моли́ Христа́ Бо́га,// творя́щих святу́ю па́мять твою́.

Му́ченик Твой, Го́споди, Лукиа́н/ во страда́нии свое́м вене́ц прия́т нетле́нный от Тебе́, Бо́га на́шего,/ име́яй бо кре́пость Твою́,/ мучи́телей низложи́,/ сокруши́ и де́монов немощны́я де́рзости./ Того́ моли́твами// спаси́ ду́ши на́ша.

В поще́нии пе́рвее просия́вшаго,/ и во страда́нии второ́е светя́ща,/ вси, я́ко свети́ло пресветле́йшее,/ Лукиа́на пе́сньми сла́вно почти́м,// моля́щаго непреста́нно о всех нас.

Я́ко святи́тель благоче́стно пожи́в/ и священномуче́ния вене́ц прия́т,/ и́дольския же́ртвы погаси́л еси́,/ до́брый па́стырь Христо́ву ста́ду бысть, прему́дре Лукиа́не./ Сего́ ра́ди тя почита́ем, пе́сньми вопию́ще:// от бед изба́ви нас при́сно моли́твами свои́ми.

Велича́ем тя, священному́чениче Лукиа́не, и чтим святу́ю па́мять твою́, ты бо мо́лиши за нас Христа́ Бо́га на́шего.