Тропарь · глас 4 Воскресный Све́тлую воскресе́ния про́поведь/ от А́нгела уве́девша Госпо́дни учени́цы/ и пра́деднее осужде́ние отве́ргша,/ апо́столом хва́лящася глаго́лаху:/ испрове́ржеся сме́рть,/ воскре́се Христо́с Бо́г,// да́руяй ми́рови ве́лию ми́лость. Кондак · глас 8 Недели о самаряныне Ве́рою прише́дшая на кла́дязь самаряны́ня,/ ви́дя Тя прему́дрости во́ду,/ е́юже напои́шася оби́льно,// Ца́рствие вы́шнее насле́дова ве́чно, я́ко присносла́вная. Тропарь · глас 4 Мученику Тимофею, чтецу, и мученице Мавре Му́ченицы Твои́, Го́споди,/ во страда́ниих свои́х венцы́ прия́ша нетле́нныя от Тебе́, Бо́га на́шего,/ иму́ще бо кре́пость Твою́,/ мучи́телей низложи́ша,/ сокруши́ша и де́монов немощны́я де́рзости./ Тех моли́твами// спаси́ ду́ши на́ша. Ин тропарь · глас 4 Мученику Тимофею, чтецу, и мученице Мавре Тимофе́я дне́сь, ве́рнии, с сострада́лицею супру́гою почти́м,/ Ма́врою, неве́стою Христо́вою,/ сих велича́юще благодерзнове́нное терпе́ние./ Си́и бо распе́ншеся, стопа́м Закла́ннаго после́доваша любо́вию,// и всех грехи́ ко Кресту́ Пригвозди́вшаго. Кондак · глас 4 Мученику Тимофею, чтецу, и мученице Мавре Многообра́зныя я́звы претерпе́вше/ и венцы́ от Бо́га прие́мше,/ о нас моли́теся ко Го́споду,/ па́мять всесвяще́нную ва́шу соверша́ющих,/ превели́кий Тимофе́е и пресла́вная Ма́вро,/ е́же умири́ти град и лю́ди,// Той бо есть ве́рных утвержде́ние. Тропарь · глас 8 Преподобному Феодосию, игумену Киево-Печерскому Возвы́сився на доброде́тель,/ измла́да возлюби́в мона́шеское житие́,/ к жела́нию до́блественне дости́г, всели́лся еси́ в пеще́ру,/ и, украси́в житие́ твое́ поще́нием и све́тлостию,/ в моли́твах, я́ко безпло́тен, пребыва́л еси́,/ в Росси́йстей земли́, я́ко све́тлое свети́ло, проси́яв, о́тче Феодо́сие,// моли́ Христа́ Бо́га спасти́ся душа́м на́шим. Кондак · глас 3 Преподобному Феодосию, игумену Киево-Печерскому Звезду́ Росси́йскую днесь почти́м,/ от восто́ка возсия́вшую и на за́пад прише́дшую,/ всю бо страну́ сию́ чудесы́ и добро́тою обогати́вшу и вся ны/ соде́янием и благода́тию мона́шескаго уста́ва,// блаже́ннаго Феодо́сия. Величание Преподобному Феодосию, игумену Киево-Печерскому Ублажа́ем тя,/ преподо́бне о́тче Феодо́сие,/ и чтим святу́ю па́мять твою́,/ наста́вниче мона́хов// и собесе́дниче А́нгелов. Тропарь · глас 1 Преподобным Иулиании и Евпраксии Московским Христу́ Жениху́ уневе́ститися возжела́вшия/ и по́двиги и́ноческия Того́ ра́ди поне́сшия,/ доброде́тельным житие́м и любо́вию ко всем/ себе́ украси́вшия, преподо́бныя Иулиани́е и Евпракси́е,/ во гра́де Москве́ пе́рвыя оби́тели деви́ческия/ устрои́тельницы яви́стеся/ и трудо́в и по́двигов бра́та ва́шего святи́теля Алекси́я/ ревни́тельницы показа́стеся./ Сего́ ра́ди, ны́не на Небесе́х вку́пе с ним торжеству́юще,/ моли́те гра́ду Москве́ в Правосла́вии утверди́тися,/ оби́тели ва́шей сохрани́тися// и спасти́ся душа́м на́шим. Ин тропарь · глас 1 Преподобным Иулиании и Евпраксии Московским Христу́ Жениху́ уневе́ститися возжела́вшия,/ преподо́бныя Иулиани́е и Евпракси́е,/ во гра́де Москве́ оби́тели деви́ческия устрои́тельницы яви́стеся/ и бра́ту ва́шему, святи́телю Алекси́ю, в по́двизех подража́сте./ Сего́ ра́ди, ны́не на Небесе́х вку́пе с ним торжеству́юще,/ моли́те оби́тели ва́шей сохрани́тися,/ гра́ду Москве́ в Правосла́вии утверди́тися // и спасти́ся душа́м на́шим. Кондак · глас 2 Преподобным Иулиании и Евпраксии Московским Что вас нарече́м, богому́дрыя Иулиани́е и Евпракси́е?/ Немощны́й сосу́д естество́м,/ но по́двиги и труды́ му́жески понесо́сте;/ смире́нныя жены́,/ но сла́вы отце́в вои́стину сподо́бистеся;/ ро́да честна́го от земны́х,/ но умале́нием себе́ Небе́снаго оте́чества достиго́сте.// Моли́те усе́рдно Влады́ку Христа́ спасти́ся душа́м на́шим. Тропарь · глас 2 Cвященномученику Николаю Беневоленскому Благода́тию свяще́нства украси́вся,/ до́брый па́стырь ве́рным лю́дем яви́лся еси́,/ и Христу́ да́же до сме́рти после́довав,/ вене́ц жи́зни от Него́ прия́л еси́./ Те́мже ны́не помина́й нас, священному́чениче Нико́лае,// и моли́ся о спасе́нии душ на́ших. Ин тропарь · глас 4 Cвященномученику Николаю Беневоленскому Я́ко чадолюби́вый оте́ц и учи́тель благоче́стия,/ па́ству твою́ до́бре упа́сл еси́,/ милосе́рдием же и кро́тостию нра́ва украше́н,/ о́браз ве́ры во страда́ниих за Христа́ показа́л еси́./ Те́мже ны́не в Небе́сных черто́зех пребыва́я,/ помина́й нас, чту́щих святу́ю па́мять твою́,// священному́чениче Нико́лае досточу́дне. Кондак · глас 6 Cвященномученику Николаю Беневоленскому Сро́дник и учени́к преподо́бнаго Алекси́я яви́лся еси́,/ священному́чениче Нико́лае всехва́льне,/ и я́ко до́блий во́ин Христо́в,/ ку́плю жите́йскую отри́нув,/ всего́ себе́ служе́нию Це́ркви Бо́жией посвяти́л еси́/ и в черто́г Небе́сный вше́л еси́, глаго́ля:/ под кро́вом Го́спода моего́// обря́щу поко́й и заступле́ние. Тропарь · глас 4 Пресвятой Богородице пред иконой Ея «Успение» Киево-Печерской Днесь све́тло торжеству́ет Пече́рская оби́тель,/ и ра́дуется явле́нием о́браза Богома́тере/ безме́рный лик Пече́рских отце́в,/ с ни́миже и мы непреста́нно вопие́м:// ра́дуйся, Благода́тная, Пече́рская похвало́. Кондак · глас 3 Пресвятой Богородице пред иконой Ея «Успение» Киево-Печерской Де́ва днесь неви́димо предстои́т в це́ркви/ и с ли́ки Пече́рских отце́в мо́лится о нас,/ благогове́йно велича́ющих Ея́ безме́рную ми́лость к ро́ду на́шему,/ я́вльшуюся в чу́дном о́бразе Ея́,// оби́тель Пече́рскую украша́ющем. Тропарь · глас 4 Пресвятой Богородице пред иконой Ея «Печерской» Днесь све́тло торжеству́ет Пече́рская оби́тель,/ и ра́дуется явле́нием о́браза Богома́тере/ безме́рный лик Пече́рских отце́в,/ с ни́миже и мы непреста́нно вопие́м:// ра́дуйся, Благода́тная, Пече́рская похвало́. Кондак · глас 3 Пресвятой Богородице пред иконой Ея «Печерской» Де́ва днесь неви́димо предстои́т в це́ркви/ и с ли́ки Пече́рских отце́в мо́лится о нас,/ благогове́йно велича́ющих Ея́ безме́рную ми́лость к ро́ду на́шему,/ я́вльшуюся в чу́дном о́бразе Ея́,// оби́тель Пече́рскую украша́ющем. Тропарь · глас 5 Пресвятой Богородице пред иконой Ея «Свенской» («Печерской») Пресвята́я Де́во Богоро́дице, / земли́ Бря́нстей благослове́ние и покро́в / Све́нский-Пече́рский о́браз Твой дарова́ла еси́, / и́мже Правосла́вие утвержда́еши, / е́реси и раско́лы побежда́еши, / исцеле́ния источа́еши, / наше́ствия иноплеме́нных отража́еши / и междоусо́бныя бра́ни умиря́еши, / те́мже благода́рно воспева́ем Тя, // Оте́чества на́шего похвалу́ и заступле́ние. Ин тропарь · глас 4 Пресвятой Богородице пред иконой Ея «Свенской» («Печерской») Днесь све́тло торжеству́ет Све́нская оби́тель;/ и ра́дуется явле́нием о́браза Богома́тери;/ Безме́рный лик Пече́рских отце́в/ с ни́ми же и мы непреста́нно вопие́м:// ра́дуйся Благода́тная Све́нская Похвало́. Кондак · глас 3 Пресвятой Богородице пред иконой Ея «Свенской» («Печерской») Я́ко цвет неувяда́емый / Ла́вры Ки́ево-Пече́рския / чу́дная ико́на Твоя́, Влады́чице Богоро́дице, / на дре́ве близ Све́ны реки́ обре́теся, / явля́ющи ме́сто но́ваго вертогра́да духо́внаго / и благоуха́нием чуде́с исполня́ющи притека́ющих к ней, / те́мже и на пре́дняя проба́ви ми́лости Твоя́, Пречи́стая, // правосла́вно Тя велича́ющим. Тропарь · глас 2 В субботу, всем святым Апо́столи, му́ченицы и проро́цы,/ святи́телие, преподо́бнии и пра́веднии,/ до́бре по́двиг соверши́вшии и ве́ру соблю́дшии,/ дерзнове́ние иму́ще ко Спа́су,/ о нас Того́, я́ко Бла́га, моли́те// спасти́ся, мо́лимся, душа́м на́шим. Кондак · глас 8 В субботу, всем святым Я́ко нача́тки естества́, Насади́телю тва́ри,/ вселе́нная прино́сит Ти, Го́споди, богоно́сныя му́ченики;/ тех моли́твами в ми́ре глубо́це// Це́рковь Твою́, жи́тельство Твое́ Богоро́дицею соблюди́, Многоми́лостиве. Тропарь · глас 2 В субботу, за умерших Помяни́, Го́споди, я́ко благ, рабы Твоя́,/ и, ели́ка в житии́ согреши́ша, прости́:/ никто́же бо безгре́шен, то́кмо Ты,// моги́й и преста́вленным да́ти поко́й. Кондак · глас 8 В субботу, за умерших Со святы́ми упоко́й,/ Христе́,/ ду́ши раб Твои́х,/ иде́же несть боле́знь, ни печа́ль,/ ни воздыха́ние,// но жизнь безконе́чная.
Мчч. Тимофея и Мавры (ок. 286) 
