Благоверный Андрей Боголюбский

Я́ко благове́рен и пра́веден,/ за любо́вь Христа́ Бо́га от свои́х смерть прия́л еси́,/ кровь свою́ пролия́в,/ я́коже пре́жде сро́дницы твои́ и страстоте́рпцы Бори́с и Глеб,/ и́хже кро́вем совопие́т и твоя́ кровь, свя́те, к Бо́гу,/ я́коже А́веля и Заха́рии пра́ведных,/ благове́рный страстоте́рпче, вели́кий кня́же Андре́е,/ с ни́миже Христа́ Бо́га моли́ о стране́ на́шей, е́же Богоуго́дней бы́ти // и сыново́м росси́йским спасти́ся.

Е́же во пло́ти житию́ твоему́ удиви́шася а́нгельстии чи́ни:/ ка́ко с те́лом к неви́димым сплете́нием изше́л еси́, пресла́вне,/ и уязви́л еси́ де́монския полки́./ Отону́дуже, Андре́е, Христо́с тебе́ воздаде́ бога́тыми дарова́ньми:// сего́ ра́ди, о́тче, моли́ спасти́ся душа́м на́шим.

В ми́ре сем благоче́стно и пра́ведно пожи́в,/ моли́твою, ми́лостынею и благострада́нием Бо́гу угоди́л еси́,/ сего́ ра́ди и Бог по убие́нии твое́м просла́ви тя нетле́нием и чудесы́,/ Его́же, свя́те Андре́е, моли́ сохрани́ти оте́чество твое́ // и всех люде́й, благоче́стно тебе́ почита́ющих.

Родочисленный Ца́рства Ру́сскаго насле́дниче, от благочести́ваго корня кня́зя Юрия плодитель первоначальствующих Ру́сских Самоде́ржцев, Боголю́бче кня́же Андре́е, му́жество и у́м в себе́ нося́щий, в пра́вде и и́стине пред Бо́гом ходя́щий, о, ве́лий единодержавный основа́телю государства но́ваго, моли́ся, да Бе́лая Ру́сь многолюдством правосла́внаго ро́да умно́жится, и све́том Христо́вым всему́ ми́ру ди́вно яви́тся, и сла́вою Бо́жией возвели́чится.

Велича́ем тя́, святы́й вели́кий благове́рный кня́же Андре́е Боголю́бский, и чте́м святу́ю па́мять твою́, я́ко ты́ сла́вне ра́товал во бране́х со врага́ми Спа́са Христа́ Бо́га на́шего.
И па́ки: Велича́ем тя́, святы́й страстоте́рпче и му́чениче кня́же Андре́е, и чте́м честны́я страда́ния твоя́, и́же за Ру́сь Святу́ю сме́рть претерпе́вый и Бо́га Христа́ просла́вивый.
И па́ки: Велича́ем тя́, святы́й великому́чениче кня́же Андре́е, и почита́ем святу́ю оби́тель Богоро́дицы, и́же ты́ пречу́дно на Ру́сской Земле́ воздви́гнувый, и Бо́гом Христо́м ди́вно просла́вленный.
И па́ки: Велича́ем тя́, святы́й вели́кий благове́рный Боголю́бче кня́же Андре́е, изря́дный страстоте́рпче и му́чениче, и чте́м святу́ю па́мять твою́, му́драго основа́теля свято́й оби́тели Боголюби́вой и мно́гих хра́мов Бо́жиих созда́телю.