Тропарь · глас 4 Предпразднства Введения во Храм Пресвятой Богородицы Ра́дость предобруча́ет всем А́нна ны́не,/ печа́ли сопроти́вный плод прозя́бши, еди́ну Присноде́ву,/ Ю́же и приво́дит, моли́твы исполня́ющи,/ днесь веселя́щися, в храм Госпо́день,// я́ко су́щий храм Бо́га Сло́ва и Ма́терь чи́стую. Кондак · глас 4 Предпразднства Введения во Храм Пресвятой Богородицы Весе́лия днесь вселе́нная испо́лнися вся/ в благознамени́том пра́зднице Богоро́дицы,/ зову́щи:// Та есть сень Небе́сная. Тропарь · глас 4 Преподобному Григорию Декаполиту и святителю Проклу, архиепископу Константинопольскому Бо́же оте́ц на́ших,/ творя́й при́сно с на́ми по Твое́й кро́тости,/ не отста́ви ми́лость Твою́ от нас,/ но моли́твами их// в ми́ре упра́ви живо́т наш. Кондак · глас 3 Преподобному Григорию Декаполиту Све́тлое тя со́лнце Це́рковь познава́ет,/ доброде́телей красота́ми и исцеле́ний луча́ми/ всех просвеща́я, Христо́в уго́дниче./ Те́мже пра́зднуем честну́ю па́мять твою́,/ и почита́ем по́двиги твоя́,// всеблаже́нне о́тче, прему́дре Григо́рие. Кондак · глас 4 Святителю Проклу, архиепископу Константинопольскому Досто́йно днесь торжеству́ет/ всех градо́в честне́йший вои́стинну в честно́м преставле́нии твое́м,// о́тче отце́в, Про́кле му́дре. Тропарь · глас 2 Преподобному Диодору (Дамиану) Юрьегорскому, Каргопольскому Жела́нием духа распали́вся,/ мяте́ж мирски́й отри́нув,/ ко Еди́ному Бо́гу любо́вию прилепи́ся/ и То́го́ вседушне взыску́я,/ во вну́треннюю пусты́ню оты́де,/ при во́дах всели́ся,/ иде́же в слеза́х и труде́х пребыва́я многоле́тное вре́мя,/ в терпе́нии мно́зе житие́ а́нгельское проходи́л еси́/ в наставле́нии Боже́ственнаго Ра́зума,/ ста́до и́нок собра́ мудре,/ и́хже посеща́я, не оста́ви, Диодо́ре преподо́бне,/ о́тче наш, Пресвяте́й Тро́ице моля́ся/ от зол вся́ческих изба́вити и спасти́ души на́ша. Кондак · глас 2 Преподобному Диодору (Дамиану) Юрьегорскому, Каргопольскому От ю́ности, преподо́бне,/ плотску́ю во́лю в посте́х и моли́твах истощи́л еси́,/ кре́ст свой взем, Христо́ви после́довал еси́,/ те́мже и к Вы́шним тече́нием ра́достно устреми́в себе́,/ иде́же со все́ми святы́ми Святе́й Тро́ице предстои́ши,/ но и ны́не ста́до свое́ посеща́я,/ помина́й чту́щих пресвяту́ю па́мять твою́,/ да вси благода́рно вопие́м ти:/ ра́дуйся, Богому́дре Диодо́ре, наста́вниче наш пусты́нный. Величание Преподобному Диодору (Дамиану) Юрьегорскому, Каргопольскому Ублажа́ем тя,/ преподо́бне о́тче Диодо́ре,/ и чтим святу́ю па́мять твою́,/ наста́вниче мона́хов/ и собесе́дниче а́нгелов. Тропарь · глас 3 В четверг, св. апостолам Апо́столи святи́и,/ моли́те Ми́лостиваго Бо́га,/ да прегреше́ний оставле́ние// пода́ст душа́м на́шим. Кондак · глас 2 В четверг, св. апостолам Тве́рдыя и боговеща́нныя пропове́датели,/ верх апо́столов Твои́х, Го́споди,/ прия́л еси́ в наслажде́ние благи́х Твои́х и поко́й;/ боле́зни бо о́нех и смерть прия́л еси́ па́че вся́каго всепло́дия,// Еди́не све́дый серде́чная. Тропарь · глас 4 В четверг, святителю Николаю Пра́вило ве́ры и о́браз кро́тости,/ воздержа́ния учи́теля/ яви́ тя ста́ду твоему́/ Я́же веще́й И́стина./ Сего́ ра́ди стяжа́л еси́ смире́нием высо́кая,/ нището́ю бога́тая,/ о́тче священнонача́льниче Нико́лае,/ моли́ Христа́ Бо́га,// спасти́ся душа́м на́шим. Кондак · глас 3 В четверг, святителю Николаю В Ми́рех, свя́те, священноде́йствитель показа́лся еси́,/ Христо́во бо, преподо́бне, Ева́нгелие испо́лнив,/ положи́л еси́ ду́шу твою́ о лю́дех твои́х/ и спасл еси́ непови́нныя от сме́рти./ Сего́ ра́ди освяти́лся еси́,// я́ко вели́кий таи́нник Бо́жия благода́ти.
