Собор Святых Пермской Митрополии

Благоукраша́ется Це́рковь Ру́сская,/ земля́ Пе́рмская ликовству́ет/ в па́мяти пресла́внаго ли́ка святы́х свои́х,/ сло́вом и житие́м Бо́гу угоди́вших,/ и́мже мы благода́рственно взыва́ем:/ О, дре́внии и но́вии подви́жницы ве́ры правосла́вныя,/ о́ви апо́стольския труды поне́сшии,/ о́ви же кровьми́ му́ченическими ве́ру утверди́вшии,/ вели́ции засту́пницы и храни́телие,/ моли́те Христа́ Бо́га// душа́м на́шим в ми́ре спасти́ся.

Ра́дуйся, Пе́рмская земле́,/ па́мять святы́х твои́х пра́зднующи,/ правосла́вия благове́стников уде́ле светоприе́мный,/ святи́телей ни́во плодоно́сная,/ в тебе́ Ура́льский Афо́н возсия́, преподо́бных жили́ще,/ в тебе́ Голго́фа вознесе́ся но́вых му́ченик,/ и́хже моще́й ра́ди я́ко антими́нс распросте́ртый зри́шися./ Те́мже и мы засту́пником на́шим взыва́ем:/ о, святи́и избра́нницы Бо́жии,/ ве́ру, смире́ние и братолю́бие в нас умно́жите,/ в покая́нии и благоче́стии утверди́те,// да спасе́ние улучи́м и ве́лию ми́лость.